عابر سبيل (مدونة هانى سعيد)

اعمل ايه علشان تحنى اعمل ايه علشان تحنى اعمل ايه علشان تلينى ليه بتقسى عليا وانتى عارفة انك نن عينى ارحمينى حسسينى ان انتى بلدى ارفضى ارجوكى بُعدى ليكى مين جاوبينى بعدى لو بايدك تقتلينى ارحمينى ماشى رح اسيبك وهبعد والدموع ف عيونى نار ماشى لكن غصب عنى ياللى سقيانى المرار ارحمينى حسسينى ........ ليا فيكى عمر عشته ليا ذكرى وناس وأهل ليا نيل وليل وشمس ليا مليون حاجة بس ليه فراقك انتى صعب وليه فراقى عليكى سهل فهمينى وارحمينى حسسينى............... هانى سعيد

حكومتنا بتفكر فى منح المواطنيين صكوك للملكية فى المنشئات العامة يعنى هيبقى من حق كل واحد انه ياخد حقه فى اى مرفق عام او اى حاجة حكومية يعنى لكن للاسف الحلو ما يكملش ممكن المواطن ياخد حقه فى كل حاجة الا فى دخل قناة السويس والسكة الحديد والكهربا والطرق والكبارى وشركة السكر وشركة الالومنيوم وكمان 70% من المجمعات الاستهلاكية انا عايز اعرف طب وبعد كدة ايه الباقى عشان الواحد ياخد حقة منه؟ يا خوفى ليقولولنا ان الباقى هو الهيئة العامة للنظافة والتجميل او الصرف الصحى انا ماكونتش عايز اخد حقى غير من قناة السويس والمترو وبس والباقى كنت هتبرع بيه لامريكا عشان الازمة المالية اللى هى فيها بس خلاص بقى القناةوالمترو مش من نصيبنا نروح نشوف حاجة تانية والارزاق على الله وعلى فكرة لازم نكافأ مؤلف فيلم عايز حقى اللى خلا الدولة تفكر فى الموضوع دا وبعد ما نكافؤه نقتله لانه اكيد الدولة هتبيع الصكوك دى لينا يعنى كل صك تقريبا مش اقل من 5 او 10 جنية يعنى اتملى يا خزنة من جيوب الشعب الغلبان تانى واضحكى يا ....... علينا وزغرطى ياللى انتى مش غارمانة...............................

كل يوم يقولو ادو المرأة حقوقها ادو المرأة حقوقها لحد ما حسسو الواحد بالذنب تجاه المرأة لكن حقوق ايه دى اللى بيتكلمو عليها؟ هو بعد اللى وصلت اليه المرأة النهاردة عايزة تانى حقوق؟ دا يبقى طمع وفراغة عين......اه والله اسف يا كل النساء عشان ماحدش يزعل لكن بأمانة انتو خليتوها خل انتو عايزيين ايه تانى ؟ شغل واشتغلتو ويمكن وصلتو لمناصب من الصعب على الرجاله انهم يوصلولها قوانيين جديدة واتسنت عشان تحميكو وتاخدلكم حقكم اخرها كان الخلع والبقية تأتى طبعا ما احنا بنعيش فعلا فى مجتمع ذكورى مش عارف هيوصل بينا لحد فين بالتفكير دا لكن العواقب ربنا يستر منها بس فعلا ربنا يستر على الرجاله من الحريم لاننا بقينا فعلا فى زمن الحريم على راى اشرف عبد الباقى زمن الشنبات بيودع انا مش عدو للمراة ومش حاقد عليها لكن عايز كل شىء يكون بالعقل وبحدود وفى حدود الشرع والمعقول مش اكتر دى المرأة وصلت لدرجة انها بقت قاضى ووكيلة نيابة و عمدة ومأذون كمان انتو عايزيين توصلو بينا لحد فين الله يخرب بيوتكم ..... شوفو الخبر دا وابقو اقرو الفاتحة على زمن الشنبات مصر تشهد أول عقد قران تنفذه أول مأذونة فى العالم الإسلامى

امبارح جاتنى الصورة دى مع تعليق ان مش مصر بس اللى فيها فقرا وشحاتيين ومتسوليين اوك انا موافق ومقدرش انكر دا لان دا حال الدنيا كلها حتى اغنى بلاد العالم لازم ولابد يكون فيها فقرا ومتسوليين وشحاتيين cest la vie او هذه هى الدنيا واحوالها..................ولكن انتو واخديين بالكم من الصورة عايزيين نعمل مقارنة بين الراجل دا المتسول وبين متسول من اللى قاعديين فى شوارع بلادنا فى اشارات المرور او قدام الجوامع ونشوف الفرق وعايزيين طبعا نسقط من الحساب كل المدعيين اللى عامليين نفسهم متسوليين او متخذيين من التسول مهنة او حرفة لكسب العيش او للنصب على الناس الطيبيين تعالو وانا معاكو نطلع شوية فوارق بسيطة بين اتنين شحاتين واحد حنشوفه مثلا فى ميدان الجيزة والتانى هو اللى فى الصورة دى نبدا بشحات بلدنا تفتكرو انه عنده جاكيت جلد زى اللى لابسه الشحات اللى فى الصورة دنا نفسى ماعنديش ! طب بلاش طب عنده كوتشى زى اللى لابسه البيه الشحات اللى فى الصورة؟! بلاش دى كمان طب عنده عربية هاند يشيل عليها حاجاته ومحتاجاته وزى ماحنا شايفيين ان صاحبنا الشحات الافرنجى بيشرب ميه معدنية ولا مش واخديين بالكم من القزازة اللى فى

امبارح جانى تليفون من حد عزيز عليا وقال انه زعلان منى وفضل يعدلى فى اسباب زعله منى الكتيرة واللى كلها بتدور حول انى مشغول البال عنه او عنها يعنى عادى هى صديقة من ايام الدراسة بس جدعة بجد وبنت بلد قوى لكن للاسف طبع حواء فيها زيادة شوية وساعات رغم عقلها الكبير احس ان ماعندهاش عقل خالص (ربنا يستر وماتقراش الكلام دا هى ما تعرفش انى عامل مدونة لحد دلوقت اوعو حد يقولها )المهم اجيلها كدة تجيلى كدة اكلمها عن العالم والواقع اللى بنعيشه تكلمنى عن تامر حسنى وعمرو دياب والمشاكل اللى بينهم اقولها امريكا مش ناوية تجيبها البر وعمالة تتفق مع اسرائيل ضد العرب تقولى ان مراد الكوافير كان هيحرق شعر صاحبتها منال لما كانت بتعمل شعرها عنده يوم التلات اللى فات عشان حفلة عيد ميلاد نهى بنت اخوها المستشار اقولها المقطم وقع على دماغ الناس فى الدويقة وسفينة مصرية اتخطفت فى الصومال تسألنى احنا هنطلع الرحلة بتاعة الاقصر واسوان اللى بتعملهاا لجامعة فى اجازة نص السنه ولا انا هعمل زى كل مرة وانفض للموضوع كله ؟ بينى وبينكم اتخنقت منها وزعقتلها ومسكت نفسى بالعافيه من انى كنت فعلا هضربها خدتها وروحتها لحد البيت ومكلمتهاش

اصحى يا مصر اصحى يا مصر هزى هلالك هاتى النصر كونى يا مصر وعيشي يا مصر مدي اديكى وطولى العصر اصحي وكوني وعيشي يا مصر اصحى يا عامل مصر يا مجدع وافهم دورك ف الوردية مهما بتتعب مهما بتصنع تعبك رايح للحراميه جهدك عملك رزق عبالك عرقك مرقك ولا يهنا لك اصحى يا عا مل غير حالك صون المصنع واصنع مصر اصحى وكونى وعيشي يا مصر اصحى يا زارع مصر الخضره قدره وخضره ونور وجمال ابدر غيطك واحمى البدره ضد الافه والاستغلال ارضك عرضك باب الدار صبحوا مداسه للسمسار نعطش ولانشربش عكار وصفه قالوها الحكما يامصر اصحى وكونى وعيشي يا مصر

99 % من الشعب المصرى عايشيين فى قصور وسرايات وعندهم شاليهات فى مارينا والساحل الشمالى بس بيدارو على شمعتهم حتى شوفو .....!

ولا فى اهمال ولا فى ناس عايشه

هما بيشترو ايه؟ عصير صح ؟

شوفتو الراجل خد العيش وخرج ازاى بسهوله؟ بس هو الطابور اوله فين؟

هوالواد دا ماله؟

حقا الشرطة فى خدمة الشعب!!!!

مش عايز اقول انى ببالغ لكن ربنا اللى عالم وشاهد عاللى بيحصل كل اما اغمض عينى كل اما اغمض عينى واعمل نفسى مش شايف بشوف كل اما اسد ودانى واعمل نفسى مش سامع بحس حالك صبح حالك وانا بيملانى خوف وياريتها تيجى عالخوف يا حبيبتى وبس وكل اما اغمض عينى و....... فاتحة دراعاتك للغريب اما القريب بتجرحيه ابنك فى غربة جوا منك رح يموت قومى الحقيه ليه حقنا بتضيعيه ليه عمرنا بترخصيه ليه كل حلم بايدك تقتليه كل اما اغمض عينى و........... بمشى فى شوارعك الحزينه بشوف بشر مابيضحكوش مابيعرفوش الا الدموع شبابيك بيوت متقفله فى عز النهار وناس مهاجرة وشاطبة على كلمة رجوع ليه حقنا بتضيعيه ليه عمرنا بترخصيه ليه كل حلم جميل بايدك تقتليه وكل اما اغمض عينى و................... على فكرة الكلام دا غناه مطرب اسمه محمد رشاد فى ساقية عبد المنعم الصاوى وهيغنيه تانى يوم السبت 1 نوفمبر ومش عايز افكركم ان الكلام من تاليفى ومن الحان محمد رشاد وغناءه والعمل دا بجد اهداء منى ليها هى وبس بحبها وماليش نصيب معاها زيكم كدة بالظبط

على اسم مصر التاريخ يقدر يقول ما شاء أنا مصر عندي أحب وأجمل الأشياء بحبها وهي مالكة الأرض شرق وغرب وبحبها وهي مرمية جريحة حرب بحبها بعنف وبرقة وعلى استحياء واكرهها وألعن أبوها بعشق زي الداء واسيبها واطفش في درب وتبقى هي ف درب وتلتفت تلاقيني جنبها في الكرب والنبض ينفض عروقي بألف نغمة وضرب على اسم مصر مصر النسيم في الليالي وبياعين الفل ومرايه بهتانة ع القهوة .. أزورها .. واطل القى النديم طل من مطرح منا طليت والقاها برواز معلق عندنا في البيت فيه القمر مصطفى كامل حبيب الكل المصري باشا بشواربه اللي ما عرفوا الذل ومصر فوق في الفراندة واسمها جولييت ولما جيت بعد روميو بربع قرن بكيت ومسحت دموعي في كمي ومن ساعتها وعيت على اسم مصر أنا اللي اسمي حتحـور .. أنا بنت رع مثـال الأمـومـة ورمـز الحـنـان تفـيض حـلمـاتي وتمـلا الـتـرع وتسـقـي البـشـر كلهـم والغـيـطان نهايته يا مصر اللي كانت أصبحت وخلاص تمثال بديع وانفه في الطين غاص وناس من البدو شدوا عليه حبال الخيش والقرص رع العظيم بقى صاج خبيز للعيش وساق محارب قديم مبتورة ف أبو قرقاص ما تعرف اللي بترها سيف والا رصاص والا الخراب اللي صاب عقل البلد بالطيش