شحات من بلاد الفرنجة

امبارح جاتنى الصورة دى مع تعليق ان مش مصر بس اللى فيها فقرا وشحاتيين ومتسوليين

اوك انا موافق ومقدرش انكر دا لان دا حال الدنيا كلها حتى اغنى بلاد العالم لازم ولابد يكون فيها فقرا ومتسوليين وشحاتيين cest la vie

او هذه هى الدنيا واحوالها..................ولكن

انتو واخديين بالكم من الصورة عايزيين نعمل مقارنة بين الراجل دا المتسول وبين متسول من اللى قاعديين فى شوارع بلادنا فى اشارات المرور او قدام الجوامع ونشوف الفرق وعايزيين طبعا نسقط من الحساب كل المدعيين اللى عامليين نفسهم متسوليين او متخذيين من التسول مهنة او حرفة لكسب العيش او للنصب على الناس الطيبيين

تعالو وانا معاكو نطلع شوية فوارق بسيطة بين اتنين شحاتين واحد حنشوفه مثلا فى ميدان الجيزة والتانى هو اللى فى الصورة دى نبدا بشحات بلدنا تفتكرو انه عنده جاكيت جلد زى اللى لابسه الشحات اللى فى الصورة دنا نفسى ماعنديش !

طب بلاش طب عنده كوتشى زى اللى لابسه البيه الشحات اللى فى الصورة؟!

بلاش دى كمان طب عنده عربية هاند يشيل عليها حاجاته ومحتاجاته وزى ماحنا شايفيين ان صاحبنا الشحات الافرنجى بيشرب ميه معدنية ولا مش واخديين بالكم من القزازة اللى فى العربية ............هيييييييييييييييه هقول ايه حظوظ !!!!!!!!!!!!!!!!!!

بلاش دى كمان تفتكرو الشحات فى بلدنا عنده كمية العفش او العزال اللى عند اخينا دا اللى محمل عربية ولسه فى جمبه رابطتيين حاجات تفتكرو فيهم ايه؟

بلاش دى كمان انتو مش ملاحظيين ان الشحات الافرنجى دا كامل الاطراف يعنى له ايديين ورجليين وعينيين وكدة زى الناس العادية؟.............والله ما بهزر بتكلم جد

اصل الشحاتيين فى بلدنا لانهم كتير بيفضلو يشحتو ويمدو ايديهم والناس ما بتعبرهمش لان الناس اصلا عايزيين يمدو ايديهم زى الشحاتيين لانهم فعلا كادو يكونو شحاتيين فى ظل ارتفاع الاسعار الجنونى وانخفاض الرواتب وكترة الزيادات فى فواتير التليفون والكهربا والميه وحتى الزباله وحتى اجرة المواصلات كمان زادت المهم الشحات يمد ايده ولا حد يعبره يقوم يفكر فى حيلة عشان يستدر عطف الناس يعمل ايه يروح يقطع ايد او رجل او عين او اى حاجة عشان يصعب على الناس بعد ما طبعا ماتكون الدنيا كلها ضاقت عليه واتقفلت فى وشه كل البيبان طبعا زى ما قولت نشيل من دول الناس الى بتدعى الفقر وتتخذ من التسول مهنه لكسب المال ودول فعلا موجوديين بنا

ولسه طبعا فى فوارق تانية هسيهالكم انتم تطلعوها وتكتشفوها بنفسكم ومع احترامى طبعا للبيه الشحات بتاع برة وتقديرى لكمية البؤس والفقر اللى موجودة على ملامح وشه الا ان الشحات فى بلدى حتى لو ما مدش ايدى بيصعب عليا لانه فعلا اكثر بؤسا وفقرا من غيره من اصدقاءه المتسوليين فى البلاد التانية وف حوارى شيكاغو وازقة منهاتن وارصفة بيفرى هيلز...............مشعارف انا يمكن اكون صح ويمكن اكون غلط لكن حبى للبلد دى بيخلينى انتقدها يمكن اكون قاسى شوية فى نقدى ساعات لكن دا ما يمنعش انى بحبها لاخر مدى وبحلم بمستقبلها الجميل وببنى امال واتمنى تتحقق عشانها عشانها وبس ...........وبرضه حتى فى دى كمان يمكن اكون غلطان او مش غلطان لانى لما ابص لقدام واحلم بفرح وبحس انى شايف جنة لكن لما ابص للواقع اللى بعيشه اليوم بخاف واتفزع بجد كابوس صعب اتخيل انى اشوفه حتى ف منام مشعارف انتو معايا ولا لا المهم انا كنت عايز اقول حاجة وقولتها

اه صحيح انا عايز اعرف الشحات فى بلدنا بيمد ايه ويقول لله حسنة قليلة تمنع بلاوى كتيرة والكلام اللى انتو عارفينه دا طب الشحات الافرنجى دا لما يجى يشحت بيمد ايده برضو ويقول لله ولا بيعمل ايه؟!!!!!