عابر سبيل (مدونة هانى سعيد)

لسة الدنيا فى ُبعدك عنى فيها الضلمة وفيها النور لسة الشمس بتبعت نورها ولسة الارض اهى بتدور لسة انا عايش رغم جراحى بضحك وابكى بسكت واحكى بسمع واشكى واعيش افراحى وانتى يا ضى عينية ارتاحى وريحى قلبك المغرور مش رح اكون من تانى اسيرك قلبى اتحرر من تأثيرك قلبى بسحرك مش مسحور ولسة الدنيا فى بعدك عنى فيها الضلمة وفيها النور لسة الشمس بتبعت نورها ولسة الارض اهى بتدور هانى سعيد

من حق كل صاحب سلعة انه يعلن عن سلعته طبعا وبما انى من اعضاء هذا الجروب ومن مؤسسسيه كمان فكان لازم اعمل دعايه عنه من الاول هنا . بس معلش ملحوقة............ لما كتبو عنا فى الجرايد وفى موقع مصراوى قالو ان سبب التسمية بالموكوسيين هى الثانوية العامة . اى نعم هى كانت وكسة كبيرة جدا بسبب حاجات وعوامل كتيرة جدا اهمها فشل النظام التعليمى فى مصر لحد دلوقت من اول الروضة لحد الجامعة ودى كارثة بكل المقاييس لان تقدم الشعوب مش ممكن يكون الا بالعلم الا ان دا سبب من ضمن اسباب كتير.......... منها مثلا ان جيلنا دا بجد كان وما زال جيل تايه وضايع بين الماضى والحاضر عايز يعيش لحظته بس مشقادر بسبب تسلط الاهل عليه او المدرسيين او رجال الدين جيل عايز يخرج من جلباب ابوه بس الجلباب عامل زى بيت جحا متاهة كبيرة جيل ممكن ينضحك عليه بسهولة بكلمتيين حنيين جيل اتعود ينام على الحواديت بتاعة سيندريللا والاقزام السبعة وكان بيخاف من ابو رجل مسلوخة جيل اتربى على ثقافة المذيعة نجوى ابراهيم وعفاف الهلاوى وسامية شرابى وكان بيعشق بقلظ وكرنبة ويستنى مازنجر وافروديت وكابتن ماجد جيل كان مش بيحب يفوت برنامج ابلة فضيلة فى الرادي