زعلانة ليه؟!!!!

امبارح جانى تليفون من حد عزيز عليا وقال انه زعلان منى وفضل يعدلى فى اسباب زعله منى الكتيرة واللى كلها بتدور حول انى مشغول البال عنه او عنها يعنى عادى هى صديقة من ايام الدراسة بس جدعة بجد وبنت بلد قوى لكن للاسف طبع حواء فيها زيادة شوية وساعات رغم عقلها الكبير احس ان ماعندهاش عقل خالص (ربنا يستر وماتقراش الكلام دا هى ما تعرفش انى عامل مدونة لحد دلوقت اوعو حد يقولها )المهم اجيلها كدة تجيلى كدة اكلمها عن العالم والواقع اللى بنعيشه تكلمنى عن تامر حسنى وعمرو دياب والمشاكل اللى بينهم اقولها امريكا مش ناوية تجيبها البر وعمالة تتفق مع اسرائيل ضد العرب تقولى ان مراد الكوافير كان هيحرق شعر صاحبتها منال لما كانت بتعمل شعرها عنده يوم التلات اللى فات عشان حفلة عيد ميلاد نهى بنت اخوها المستشار اقولها المقطم وقع على دماغ الناس فى الدويقة وسفينة مصرية اتخطفت فى الصومال تسألنى احنا هنطلع الرحلة بتاعة الاقصر واسوان اللى بتعملهاا لجامعة فى اجازة نص السنه ولا انا هعمل زى كل مرة وانفض للموضوع كله ؟
بينى وبينكم اتخنقت منها وزعقتلها ومسكت نفسى بالعافيه من انى كنت فعلا هضربها خدتها وروحتها لحد البيت ومكلمتهاش ولا كلمة لقيتها بتتصل بيا بالليل وتقولى انها زعلانة منى وعايزانى اصالحها فكتبت لها الكلام دا وبعتهولها على الايميل بتاعها ولسه ماردتش عليا تفتكرو هترد عليا تقول ايه؟ انا مش هطول عليكو فى التفاصيل تعالو شوفو انا كتبتلها ايه
زعلانة منى ؟!
طب زعلانة ليه؟
خايفة اكون فى البعد نسيتك؟
يخرب عقلك.....يخرب بيتك
لو هنساكى هفتكر ايه؟
هفتكر انى ماليش احباب؟
هفتكر انى فى بلدى غريب؟
هفتكر ان العيشة عذاب؟
وان امال الناس بتخيب؟
والاحلام ما بتتحققش
والحكايات مابتتصدقش
وان الشاطر فى الدنيا دى
ابكم واخرس مابينطقش؟
مابييفهمش مابيرحمش
لو يقولولو اقتل يقتل ....اسرق يسرق.....احرق يحرق
واما بيفهم يعمل نفسه مابيفهمش
وبعد دا كله تقولى انساكى؟!!!!
انساكى ايه؟
ولو انساكى يا ضى عينيه
ردى قوليلى هفتكر ايه؟
هفتكر انك بنت الباشا
ومهرك انا مقدرش عليه؟
ولا افتكر ان انا مش لاقى
حتى فى جيبى ربع جنيه؟
كنت امبارح بقرا جريدة
عند الواد ميمون الخوجة
لفتت نظرى كلمة جديدة
عن احوالنا الزفت العوجة
قال السيد ابن السيد
ان الفقر خلاص هيموت
وان الناس فى بلادنا هتسكن
احلى مساكن واحلى بيوت
رديت قولت فى سرى ياهوووووووووووه
هلاقيها مالواد ولا ابوه؟!
ردو قولولى ازاى يا خوانا
كدة بسهوله الفقر يموت
والملايين فى بلادنا يا عالم
مش لاقيين لا علاج ولا قوت
بعد دا كله تقولى انساكى؟
انساكى ايه؟
ولو هنساكى يا ضى عينية
ردى قوليلى هفتكر ايه؟
ايوة قوليلى هفتكر ايه؟
كلمات: العبد لله