مبرووووووووووك

والله انا ماعنديش تفاصيل كتير عن الموضوع لكن كنت من وقت للتانى بتابع المنشتات الرئيسية بتاعته فى الجرايد والنهاردة كان النطق بالحكم فى القضية واللى كسبها رجل الاعمال المصرى نجيب ساويرس زى ما بيقولو عليه الصعيدى اللى ما بيسيبش حقه طبعا الموضوع بختصار ان شركة موبينيل فى شركة تانية عايزة تاخدها اسمها فرانسيس تليكوم وساويرس قالها بالنص على جثتى ان موبينيل تبقى ملك اى دولة غير مصر واهل مصر (نص كلامه ) وبعدين الشركة الفرنسية رفعت قضية وشوية حوارات كدة وكان فى خوف انها تكسب القضية خاصة انها عاملة عرض بشرا السهم الواحد تقريبا بالفين وربعمية ضعف تمنه (الارقام عندى بتتكتب بلغة غريبة معذرة هكتب كل الارقام بالحروف ) وهنا عم الحج ساويرس رفع ايده للسما ودعا وطلب من كل المصريين انهم يصلو ويدعو حتى تظل موبينيل مصرية والنهاردة كان النطق بالحكم اللى قرر بالفعل ان موبينيل هتفضل لاولاد مصر الكرام ووالله ووالله والله انا ماليش اى مصلحة شخصية فى الموضوع دا لكنى فرحت من حاجتين الاول لما لقيت ان فى ناس كتير فرحانيين بالحكم ببقاء موبينيل لساويرس وقالوه عنه انه من رجال الاعمال الشرفاء خاصة ان سمعة رجال الاعمال حاليا زى الزفت والهباب وكلنا عارفين وفاكرين فلان اللى صرف ملايين علشان واحدة ست مطربة ولما زهقت منه او هربت منه الله اعلم قتلها والتانى اللى صرف او اتاخد منه بطريقة سحرية مبلغ ماعرفش جابو منين او ازاى مئتين واربعين مليون وشوية اى اكتر او قليل مش فاكر بالظبط لكنه مبلغ بالملايين يخوف والله صراحة ضحكت عليه الست وخدته منه وهو قاعد يلطم ويقول جاى زى .... دا من دعا الناس الغلابة اللى مش لاقيين ياكلو او اللى بينامو فى عز البرد على الرصيف من غير غطا للاسف صورة رجال الاعمال فى مصر صورة اكثر قتامة وفظاعه مما نراه فى اى مكان اخر من بلاد الله

فكان ساويرس اللى انا النهاردة شوفت حب الناس ليه نموذج لرجل الاعمال المصرى اللى رافض ان اى ملكية مصرية تصبح تحت وطأة اى بلد او يد غير مصرية وكلنا ولله الحمد بنتابع وماشوفناش عن الراجل حاجة او خبر يقول انه جرى ورا مطربة او رقاصة او ممثلة او اى وحدة ست مهما كانت او عمل حاجة تخل بالشرف والاداب المتعارف عليها فى بلدنا الحبيبة مصر

تانى حاجة من اسباب فرحتى بالموضوع دا ان فى ناس بيقولو ان فى فتنة طائفية فى مصر وان المسيحيين مضطهدين وانهم اقلية مهضوم حقها وسط الاغلبية المسلمة وطبعا والله كل دا لغط وكلام غير واقعى بالمرة واى حدث فردى لا يعبر عن راى الجماعة بالقطع ولو شوفنا خير دليل على كلامى ان معظم الناس اللى كتبو تعليقات بالفرحة والمباركة لساويرس على حكم القضاء اليوم كانو من المسلميين وكلهم يقسمون انهم يحبونه فى الله لاخلاصه لبلده ولعمله ولانه ابن بلدهم مصر وهنا نجد رابط الموضوع الذى اتكلم عنه مصداقا لكلامىwww.masrawy.com/news/egypt/politics/2110/january/13/saweras.aspx.
لان مصر عمرها ما فرقت بين ولادها مسلم ومسيحى وكلنا شركاء فى نفس المصير والتفاف اناس مسلمين حول رجل مسيحى مصرى ومؤازرته فى محنته ومشاركته احزانه واطراحه لخير دليل على كذب ادعاءات من يدعى بوجود عنصرية مذهبية او فتنة طائفية فى مصر

فمصر ستظل مصر عظيمة بابناءها الاوفياء وتاريخها يشهد بذلك بين كافة شعوب العالم