دى قلة ادب

في بلدٍ لا يحكم فيه القانون
لا يوجد مستقبل
في بلدٍ يدخل فيه الناس إلى السجن بمحض الصدفة
لا يوجد مستقبل
في بلدٍ يتمدد في جثته الفقر كما يتمدد ثعبانٌ في الرمل
لا يوجد مستقبل
في بلدٍ تتعرى فيه المرأة كي تأكل
لا يوجد مستقبل
انتحروا أو موتوا
طبعا كلنا عارفين ان دى كلمات عمنا الراحل الشاعر صلاح عبد الصبور ودا واحد من انبل واجمل واحسن اولاد مصر اللى اخلصو فى حبهم للبلد وكلماته تقطر حبا لمصر رغم كم الاسى والحزن والخوف من المستقبل اللى بيبان من كلمات عمنا المبدع زى ما شوفنا ولكن ....

انا حبيت تكون بدايتى بكلمات صلاح عبد الصبور لانها كانت نبؤة لما يحدث اليوم على ارض بلدنا الحبيبة مصر ولكن ....

فى البداية كنا كلنا بلا استثناء بنلوم ونعتب على بعض كافراد او كحكومات والشعب يشتم فى الحكومة ويتهمها بالاهمال والظلم والحكومة تضطهد الشعب اكتر وتقول ان الناس والمواطنين زى العيل الصغير مش فاهم مصلحته ودايما محتاج اللى يوجهه ودايما الشعب ما ببيعجبوش حاجة حتى لو الحكومة اتشقلبت وعملت اراجوز من اصغر حد فيها لحد اكبر حد فيها لكن .....

الكلام دا لحد امتى وكان بيحصل لحد امتى وهيحصل لحد امتى ؟؟؟؟؟؟؟؟؟؟؟

امتى كل واحد فينا هيفهم دوره بجد ويعرف المطلوب منه عشان تكون بلدنا بجد اجمل واحسن بلد فى الدنيا بجد مش بالكلام؟ امتى هنتخلص من تعليق عيوبنا على شماعات غيرنا؟ امتى هنتخلص من توجيه التهم لبعضنا بسبب وبدون سبب؟ امتى كل واحد فينا هيشوف اى غلط يحاول يصلحه من سكات من غير ما يقول وانا مالى او من غير ما يصلحه عشان يقول انا عملت كذا وكذا ؟امتى كل واحد بيحب البلد دى بجد يقدر يقولها بحبك بالفعل مش بالكلام وبس من غير ما يضر حد ويبقى حاسس من جواه فعلا بالحب دا ؟ امتى وامتى وامتى؟

ولكن................

للاسف نبؤة عم صلاح عبد الصبور يبدو انها بتتحقق لا يوجد مستقبل ولكن مش عشان كدة وبس ومش عشان الاسباب اللى قالها عم صلاح وبس لكن عشان كمان ان احنا بقينا راضيين ومقتنعين بالغلط اكتر من اقتناعنا بالصح والصواب بنشوف الغلط ونسكت (ياعم وانا مالى - ياعم خليك فى حالك - انت هتعملى فيها مصلح اجتماعى - هو انت بقى اللى هتصلح الكون - انت جاى تبحث عن المدينه الفاضلة هنا فى مصر هأ أو -) مش دا الكلام اللى بنسمعه لو شوفنا غلط وحاولنا نصلحه باى شكل من الاشكال؟

والله العظيم والله العظيم دى منتهى قلة الادب

النهاردة بلدنا كلها عمالة تقول وتعيد وتزيد وتتكلم عن انفلونزا الخنازير وتحذر الناس منها طب وانفلونزا قلة الادب دى هنعمل فيها ايه؟ (المطلح دا فعلا استفذنى من حوار الاعلامية الجميلة ريهام سعيد فى برنامج صبايا واستعرته منها)

بالصدفة والله كنت جاى من برة تعبان نمت وصحيت لقيت الماتش خلص بين مصر والجزاير وكلنا عارفيين النتيجة المهم قولت اقلب فى القنوات اشوف اى حاجة مسلية على بال ما افوق شوية اتفاجاءت ببرنامج صبايا على قناة المحور وكان موضوعه عن التحرش الجنسى والاغتصاب وبجد والله لما الواحد شاف حال شباب بلدنا والحالة المتردية اللى وصلو ليها من السفالة وقلة الادب الواحد بيحزن عايز افهم انا واعرف يعنى ايه ولد يعاكس بنت ماشية ويشدلها البلوزة او يخدش حياءها او يتطاول ويمد ايده على جسمها ؟ دا المفروض ياخد مش بالجذمة دا لو فى اقوى من كدا كمان ياريت وبعدين الاهالى فين ؟ قصدى الناس اللى فى الشارع ازاى بقوا يرضو يشوفو ويسكتو على الحاجات دى هما البنات اللى بيمشوا فى الشارع دول مش اهالينا برضو فى حد يرضى يتعمل فى اخته او امه او اى واحدة قريبته كدة زى ما بيتعمل فى الشارع كدة فى بنات الناس؟ والله الموقف محزن

وبعدين حادث الفتاة هبة اللى اتخطفت واعتدى عليها 7 شباب لمدة 38 يوم ووالدها اتفصل من شغله اثناء فترة اختطافها لانه كان مشغول بالبحث عنها نفسى اعرف هنا والسؤال للجهات الحكومية مع الاعتذار مسبقا ولكن يعنى ايه تقدرو تقبضو على واحد من السبعة اللى اغتصبو البنت والباقى 6 هاربيين مش عارفيين توصلولهم لان الولد مش راضى يعترف على اماكنهم؟ ازاى ومع الاسف انتو عندكو اساليب تخلى الجبل ينطق بتستخدموها مع حتى الابرياء والشرفاء اللى بيقعو تحت ايديكو تجاوزا هنقول فى حالات الخطأ او السهومن بعض الجهات معقول مش عارفيين تستخدمو اساليبكو دى مع حد سافل جبان بالشكل دا انتهك حرمة بنت بلده باللوقاحة وقلة الادب دى واتصل كمان باصحابه عشان يشاركوه فى جريمته البشعة دى معقول لحد دلوقت صوت احق اخرس والحق ايدة قصيرة ؟ معقول؟ وكمان الاب اللى اترفد من شغله فى الظروف دى هل ياترى هيتساب كدة؟ هل مفيش اى ايد تساعده وتعاونه ؟ وازاى والف مليون ازاى الناس تكون جاحدة وقاسية على بعضها بالشكل دا معقول جيران الاب دا والد البنت الضحية يعايروه والاولاد فى المدرسة يعايرو اخوات البنت هبة الضحية المجنى عليها بالحادث دا كما لو كانت هى المذنبة مش الضحية ؟ فين الضمير هنا او الاخلاق او حتى التمييز يا عالم هو مين اللى مفروض نقف جمبه امال لما الضحية نعايرها ونقتلها بالكلمات او التصريحات والهمز واللمز والحركات دى نعمل ايه مع المجرم الجانى؟ دى والله ماعارف اقول عليها ايه لكن حسبنا الله ونعم الوكيل والله يعوض على اخلاق اهلك يا مصر

والمصيبة الكبيرة لما يكون قدام اى مدرسة زى ما كلنا بنشوف طوابير ولاد مسنتيين اى بنت تخرج من المدرسة عشان يعاكسوها ويتطاولو عليها او يخدشو حياها بلفظ اوفعل زى ماكان واضح حتى فى تصوير حلقة البرنامج او زى ما ممكن نشوف دا كلنا قدام اى مدرسة فى اى مكان دلوقت

وللاسف فين الشرطة فين السلطات الحاكمة هى الشرطة مش فى خدمة الشعب برضو ولا خلاص الكلام دا بقى فلكلور او موضة قديمة انا مش متخيل ازاى مديرة المدرسة تتصل بقسم الشرطة وتطلب نجدة لحماية البنات من الناس اللى قدام ابواب المدرسة طوابير عشان يقومو باى فعل فاضح لبناتنا والقسم يرد ويقول (يوووووووووووه دى المدرسة اقفلو الخط اقفلو الخط ) يا صلاة النبى امال لما الجهة اللى مفروض تقوم بالحماية تعمل كدة ايه يكون رد فعل الجهات التانية وازاى اخواتنا وبناتنا هيروحو مدارسهم او كلياتهم فى امان ازاى اى حد فينا يطمن على اهله وهو بعيد عنهم فى شغله او فى سفر حتى ازاى يكون حال ولاد البلد كدة مع بعضهم امال مع الاغراب هيكون الوضع ايه؟وازاى لما الشرطة تتعطف وتجيب حد يحمى البنات دول تبعت حد بدال ما يحمى بنات المدرسة يشارك الاولاد السفلة فى معاكسة البنات اللى مفروض يحميهم ووالله انا شخصيا حصل قدامى موقف زى كدة فى جامعة القاهرة كنت انا وبنتين من الزميلات فى الحرم الجامعى امام باب المدرج واتفاجأ بالحرس الجامعى اللى مفروض يكون حرس لكل واحد داخل الجامعة من اى مضايقات خارجية اتفاجأ بيهم هما اللى بيسببو المضايقات والمعاكسات لزميلاتى والله كنا فى قمة الادب ولم يصدر مننا اى قول او فعل ينم عن اننا حد مش كويس لكن اللى حصل واول كلمة اتقالت بعد اللى حصل دا من احدى زميلاتى قالت (هما دول اللى مفروض يحمونا؟!) والله الحاله مخجلة . مخجلة قوى

ويا سلام على الاستهبال والاستهتار بتاع بعض الشباب اللى يبرر اعماله القذرة دى ويقول اهو طاقة بفرغها او بعيش شبابى او مفيش شغل وفى فراغ وفضا ومفيش حاجة اعملها فبعاكس .

يا سلام وحياة امك !(مع عدم الاعتذار لهذا الحيوان وامثاله) يعنى ايه الكلام دا؟ يعنى الناس اللى ظروفها تبقى صعبة واتخرجت من جامعات ومش لاقيين شغل او مش عارفيين يتجوزو بسبب مصاريف الحياة وبقالهم سنييين يعاكسو بنات الناس لحد ما تجيلهم وظيفة؟او لحد ما يقدرو على مصاريف الجواز ؟ دا فى شرع مين ان شاء الله ؟ شرع ام لالى ولاشرع امو ترتر؟ وبعدين مهما كان عندك كبت وغرايزك مش قادر عليها ياخى افتكر ان اللى انت ناوى تأذيها دى ممكن تكون قريبتك او ممكن تكون اختك فى مكان تانى وهيتعمل فيها زى ما حضرتك عايز تعمل كدة بالظبط هتتصرف ازاى؟ وبعدين كمان ليه دايما بنعمم اه فى بنات مش محترمات ممكن يخرجو من بيوتهم وهما شبه عرايا ويستاهلو الحرق لكن مش كل البنات اللى بيتأذو فى الشارع من المعاكسات وقلة الادب دى لابسين عريان او محذق او كاشفيين اجسامهم ياخى دا حتى المحجبات والمنقبات والله بيتعاكسو ويتأذو هما كمان دلوقت فى ايه تانى اكتر من كدة وقاحة وسفالة وقلة ادب ؟

دا بس عشان فى ناس رمت العيب كله على البنات والحق ان طبعا فى كدة وفى كدة بس فعلا والله انا شايف ان معايير الاخلاق عندنا اختلفت واتغيرت دلوقت البنت لما يتقدملها واحد بتكون مستعدة تتجوزه حتى لو كان بيعاكس او عاكس او اذى اى بنت بلفظ او فعل فى الطريق العام واهلها بيفرحو بكدة ويقولو دا مقطع السمكة وديلها ويفرحو ( الله يخرب بيت ام دا تفكير هيودينا كلنا فى داهية ) ماهو لما قليل الادب يترحب بيه بالشكل دا والمحترم يتقابل بالرفض والوش الخشب زى ما بيقولو يبقى احنا كنا بنبنى عيلة هيكون اساسها قلة الادب والسفالة والانحطاط هنضيع الاخلاق الحميدة وهنربى ونغرس فى نفوس ولادنا الرذيلة بدل الاحترام والنبل والشرف والله والله والله لو كل اهالينا لما يتقدم لبنتهم واحد اتعرف عنه انه كان بياذى بنات الناس فى الشارع باى شكل قولا او فعلا لو الولد اترفض كعريس واترفض كمان كنموذج بين الناس وانقطعت معاملاتنا مع امثاله والله هيكون عبره لامثاله ولو الحكومة تقبض على واحد بس من السفلة اللى بيعملو المعاكسات فى الشارعاو بيتحرشو بالبنات او بيغتصبوهم وتجلدهم او تقتلهم فى ميدان عام قدام اهلهم واصحابهم وكل معارفهم هنلاقى الواحد من دول يفكر مليون مرة قبل ما يعمل حاجة من دى يندم عليها طول عمره لكن....

للاسف احنا رايحيين للمجهول الغائم الصورة للمستقبل الباهت طول ما فى الصور المخزية الغير مشرفة دى وعايشة بنا فى مجتمعنا المصرى العربى مش عايز اقول المسلم عشان كمان دا المسيحية كديانة بتدعو لمكارم الاخلاق مش الاسلام بس ولكن .....

اتمنى من الله ان تتغير الامور وترجع كل الامور زى الاول واحسن لان بلدنا دى عظيمة بجد والله ولازم نكون اد مسئولية انتمائنا ليها نفسى نبقى مصريين قولا وفعلا نكون زى ما رسول الله بلغ عننا اصحابه ووصى علينا ووصف اهل مصر بانهم خير جنود الارض نفسى كل واحد فينا يفهم دوره بجد ويعمل الشىء اللى مفروض يعمله بكل امانة نفسى لما الواحد مننا يروح شغله او يسافر يكون مطمن على اهل بيته وبناته لما ينزلو الشارع عشان يشترو لوازم البيت او لما يروحو مدارسهم وكلياتهم نفسى بجد يرجع الامان لشوارع بلدنا نفسى ترجع مصر .... مصر مش اى حاجة تانية نفسى اهلها يحبو بعض ويخافو على بعض حقيقى زى الاول زى زمان.... زمان فاكرين؟! حتى اللبس كان عامل ازاى عريان اكتر من دلوقتى لكن ماكانش فيه تحرشات فى الشوارع وقلة ادب زى دلوقتى ليه يا ترى ؟

فى النهاية ادعو الله ان يكون بكرة اجمل من النهاردة وترجع مصر مصر والمصريين يرجعو مصريين حتى النخاع كما كانو والا على الدنيا السلام