عرفته لكن بعد فوات الاوان

بالصدفة كنت بسمعه وبشوف ردود افعاله المختلفة على كل سؤال كانت بتسأله المذيعة المستفذة احيانا منى الحسينى ومش عارف اعبر واقول ازاى ان كلامه كان بيجبرنى انى ما حولش على اى قناة تانيه حتى لما كانت بتيجى فقرة اعلانية ما كنتش قادر احول على قناة تانيه مخافة من ان الفقرة تخلص بسرعة ويقول هو كلام وانا ملحقش اسمعه

بجد والله وهو كان بيسرد بعض من سيرة حياته ومن غير خجل او تكبر مش زى ناس اول ما يظهرو بس فى الصحف او الشاشات يدولك تصريحات عن اهلهم اللى فى امريكا وتربيتهم اللى فى المدارس الفرنسية وازاى الثورة لما قامت اممت ثروتهم فعملو ثروة تانيه من الصفر لااااااااااااااااااااااا الراجل دا بقى ماكانش كدة خالص اتكلم عن نفسه بصراحه وازى وهو كان طالب فى كلية هندسة قسم اتصالات كان بيحب العمل والشغل وعمل مشروع صغير جاب فيه حتة ارض وجاموسه واجر بائعيين عشان يبيعو اللبن اللى هتنتجه الجاموسه واللى بقت بعد كدة جواميس وكمان جاب للبايعيين عجل عشان ما يمشوش كتير ويقدرو يتحركو بسرعة وكان بيروح يباشر العمل فى المشروع دا كل يوم تقريبا الساعة 6 الصبح ويخلص بعدين يروح كليته الساعة 9 الصبح ومنها يرجع تانى عشان يحاسب العمال بتوعه فى اخر اليوم كمان اتكلم عن زراعته للكرنب وعلى حد قوله قال انه فاكره لانه كسبه كتير عن اى محصول تانى كان بييزرعه

كمان حكى عن مشروع تخرجه اللى خد عليه امتياز وكان عبارة عن عمل كابل بيربط الاسكندرية بمصر تليفونيا ومن هنا لهناك بيغذى كل المنطقة اللى بيمر عليه من طنطا لدمنهور لباقى المحافظات وكمان بيشيل مش فاكر كام قناة تليفزيونيه على نفس الكابل وشوية تفاصيل تانية انا مش فاكرها طبعا

واد ايه كان خفيف الظل خاصة لما اتكلم عن سبب منعه للسفر خارج مصر ايام عبد الناصر واتهامه بعمل مؤامرة لقلب النظام وقتل عبد الناصر وطبعا كل دا كان تلفيق ومحاولة للضغط على عبد اللطيف البغدادى اللى كان عبد الناصر عايز يرجعه لمنصبه تانى ولكن ناس فى السلطة ساعتها شافت ان عبد اللطيف البغدادى لو جه تانى هيخليهم مش على راحتهم فى اللى عايزين يعملوه فدبرو مؤامرة باسمه واسم كل اهله وكان صاحبنا دا متجوز بنت عبد اللطيف البغدادى وكان اصلا مسافر لندن ورجع مصر بس عشان يشوف اهله مش اكتر لكنه اتفاجأ باللى حصل وعرف انه كمان كان متراقب فى لندن وان مراقبته فى لندن كلفت الناس دول فلوس كتير فقالو نمنعه من السفر ونراقبه هنا فى مصر على راحتنا .................

كمان يعنى كان بيتكلم عن البيزنس بطريقة فيها لمحة اسلامية مش زى ناس دلوقت نست ان فى اله بيراقبهم وان فى يوم للحساب الراجل كان بيقول انه دايما بيعمل حساب للكام الف عامل اللى فاتحيين بيوت وشغاليين عنده او فى شركاته فى الوقت اللى اى رجل اعمال دلوقت يقولك ملعون ابو اى عامل المهم انى اكسب باى شكل وماتعملوش حساب لحق اى حد شغال عندى ودا واقع ملموس والله بنعيشه

كان بيفضل انه يشتغل على انه ينام سألته منى الحسينى تنام وترتاح من التعب ولا تعمل صفقة جديدة قالها لا اعمل صفقة بس الفلوس انا بحبها وعمرها ما هتكون غايه دى وسيلة عشان اعمل اللى ربنا يقدرنى عليه وافتح البيوت بتاع الناس اللى شغاليين معايا وفى لمحة كدة اتكلم عن اسلوبه لتربيته لابنائه وانه خلاص لما ابنه بلغ 21 سنه بقى عيب عليه يقول هات يا بابا وانه لازم كدة يعتمد على نفسه

واتكلم عن انه ازاى مؤمن ان حكومتنا المصرية لو حطت ايديها فى اى حاجة بتخربها وتجيب اجلها ههههههههههه والله دا رايه اللى كرره كتير

كمان لانه كان مدير شركة اتصالات كبيرة قوى قال رايه فى المنافسة الموجودة حاليا وتوقعاته لسوق الاتصالات فى مصر وازاى انه كان اول واحد او كان هو المصمم للتليفون اللى بيركب فى السيارة يعنى عربيه مجهزة بتليفون مش بس تكيف بقولكو راجل مفكر بجد

كمان لما اتكلم عن مشروعه الاخير بتاع انشاء تجمع للاعمال الماليه فى منطقة القلعة والمشاكل اللى وقفت المشروع والاتهامات اللى اتوجهتله وازاى كان بيرد على كل اتهام وبيتمنى لو يشوف حد من اللى بيتهمه ويعرف هو ليه اصلا بيتهمه ويغلط فى حقه بالباطل ودون وجه حق وازاى انه كان بيجيب وياخد اراء الناس والجهات المختصة فى المشروع عشان مايبقاش فى اى غلط يعنى راح للدكتور زاهى حواس اللى خلاه يتمشور بينه وبين منظمة اليونسكو وبين وزير الثقافة فاروق حسنى والمكاتب الاستشارية والهندسية ودا كله بسبب ان مشروعه قائم فى منطقة اثرية علما بان ارض المشروعه كانت مقلب للنفايات ومخلفات مواد البناء والهدم ههههههه كمان قالو انه نجح فى انه يعمل اللى ما قدروش يعملوه الصليبيين او الاسرائليين مع بعض ازاى؟ قالك ان الصليبين فشلو فى هدم المسجد الاقصى وكذلك الاسرائليين فعملو خنادق عشان تمر من تحت المسجد الاقصى فيضعف بنائه فيهدم امه هو بقى عمل ايه عايز يهدم العمل اللى خلد ذكر صلاح الدين قاهر الصليبيين وهو القلعة عن طريق حفر خنادق من ارض المشروع لغاية ااالقلعة وبكدة يهدم القلعة ويضيع اثر صلاح الدين فى مصر ههههههههههههههههه

طبعا كل دا كان افتراء على الراجل دا اللى بجد انا وانا بسمعه استمتعت بحواره واتمنين انى احاول اخطى بعض خطواته متمنيا التوفيق والنجاح من الله

وكان فى نفسى انى اتصل بيه وتقابل معاه واخد منه حديث لكن ما هى الا دقائق حتى سمعت خبر وفاته رحمه الله وتغمده برحمته وادخله فسيح جناته

طبعا انا كنت بتكلم عن رجل الاعمال المصرى محمد نصير

واللى ما يعرفوهوش اسمحولى اعرفهم بيه لكن سامحونى بعد فوات الاوان لكن لعلنا نتخذ من مسيرته نهج لنا فمن هو محمد نصير؟

عمل الراحل فى مجالات مختلفة منها البترول والاتصالات والغزل والنسيج والخدمات الطبية وخاض قبيل مرضه معركة مع أطراف مختلفة حول إقامة أبراج القلعة والتى كان يعتزم جعلها مركزاً مالياً عالمياً.
كان نصير قد ترك رئاسة مجلس إدارة «فودافون» وباع حصته فيها منذ نحو عامين، وعمل فى بدايات حياته مع مركز الأهرام «أماك»،
كما عمل لفترة فى ليبيا وإنجلترا وإيطاليا، وقد حصلت مجموعته منذ عام ونصف العام على وكالة «كيا موتورز» الكورية المشهورة.

وقد اكتسب محمد نصير شهرة واسعة فى عالم الأعمال منذ بداية الانفتاح الاقتصادي عام 1974 ، حيث أسس مجموعة "ألكان" التي يمتد نشاطها للاتصالات والتشييد والبناء والغزل والسيارات ، وتمارس أعمالها فى 11 دولة.

وقد قضى محمد نصير الثلاثة أشهر الأخيرة في رحلة علاج متنقلا ما بين بريطانيا وألمانيا ، حيث وافته المنية مساء الجمعة فى ألمانيا بعد صراع طويل مع المرض وشيعت جنازة محمد نصير - 72 عاما - يوم الثلاثاء من مسجد آل رشدان بمدينة نصر.
نصير له ولدان: خالد رجل أعمال، وعاليا التى تعمل فى مجال الديكور.

واللى هيدخل على الرابط دا هيشوف ازاى انه كان محبوب من العمال بتوعه ومن اصحابه ومن كل اللى عرفوه

http://www.almasry-alyoum.com/article2.aspx?ArticleID=212204

فرحمة الله على محمد نصيرواحسبه عند الله من الصالحين