يا ترى يا بكرة مخبى ايه تانى

التاج جالى من خلال الصديقة العزيزة والعدوة اللدودة ميرام وانا طبعا بشكرها عليه وطبعا

كالمعتاد اتأخرت فى الرد على اسئلة التاج

بسبب انشغالى وكمان عشان الاسئلة اللى فيه تقريبا شخصية وانا كنت متردد فى انى


اقول او اتكلم عن حياتى الشخصية مهما كانت قلة

المعلومات اللى هتتقال لكن تشجعت وقلت خليها على الله ومش هكشف سر الكنبلة النووية

يعنى هخاف من ايه ولنبدا ونقول بسم الله الرحمن الرحيم

اسمك؟

هانى

المشهور بيه بين اصحابك؟(اسم الشهرة يعنى) ؟

والله فى كتير happy والمايستروالواد الشاعروالفنان والدكتور وعمنا المخرج وهنوش وانوش وابوهانى وهن دول اللى على بالى

دلوقت لكن فى كتير والله وكلهم عندى زى بعض لكن بيختلف فى المكان اللى بيتقال فيه اللقب فى الجامعة او فى المسرح او مع منتخب

الكورال او مع اساتذتى فى الجامعة او حسب المكان اللى بتواجد فيه وخلاص ( حاجة تزهق مش كدة )

سنك؟


ليه الاحراج دا يا اخ عموما سنى 28 سنة ( وامسك الخشب)


اسم مدونتك ؟


على اسم مصر والاسم دا له حكاية معايا وهو انى وانا بعمل المدونة كنت اخترت الاسم

ورسيت عليه خلاص وعملت اول بوست فيه

وكان قصيدة على اسم مصر لعمنا كلنا صلاح جاهين ووزعت اللينك على اصحابى وبقوم

يقولولى ليه السياسة وليه كدة وينصحونى ويقولولى بلاش يا بنى لتتاخد وتبقى ذكريات زى

غيرك وانا اقول لا انا بعمل حاجات خفيفة مفيهاش حاجة تقلق وبعد مدة لقيت الجرايد

بتتكلم على المدونة وزيارة رئيس الوزراء احمد نظيف ليها وزمايلى يقولولى لاما مبروك

لاما هتوحشنا وانا ماكونتش فاهم فى ايه .بعدين عرفت ان فى حد يسارى عامل مدونة

بنفس الاسم ومبهدل الحكومة شتيمة وبلاوى زرقا انا قولت وبعدين بقى انا مش ناقص قلق

هى ناقصاك انت كمان يسارى ايه يا عم تحيا الحكومة وعاش نظيف ومصر هى امى

وبعشق ترابها بس ترابها دخل فى عينى وايه يعنى نتحمل عادى (الجبن سيد الاخلاق

ومن الشجاعة ان تجبن ساعة) هسيب العيال وامهم لمين ؟ رحت عامل تميز خليت اسم

المدونة على اسم مصر مدونة هانى سعيد يعنى واخدين بالكو يا بتوع الحكومة ولا يسارى

ولا نيلة انا واحد تانى هههههههههه وقد كان الاسم دا حتى الان


مجال دراستك؟


ماجستير اداب فى تاريخ العصور الوسطى وشوية كورسات ودبلومات فى السينما

والمسرح و مجال الاى تى (I t )لانى بحب الشغل على ومع الكمبيوتر جدا جدا جدا سواء

سوفت وير او هارد وير رغم انى كنت بكره اى حاجة فيها هارد وير وكنت

بترعب من الهارد وير لكن دلوقت ولله الحمد بقيت فعلا بروفشينال ودا راى الناس كمان

مش رايى انا


الصورة الرمزية للمدونة بتعبر عن ايه؟


هههههههههه لا وحياتك دى مش صورة ولا رمزية ولا بتعبر عن المدونة دى بعيد عنك

خيبة تقيلة كنت عامل نفسى راهب او كاهن او حد له رساله وعايز يوصلها ومتخفى عشان

ماحدش يعرفه ويوصل رسالته بسلام لكن فشلت العملية اكس واحد وسبعين والعميل

اتكشف وهو الان فى طريقه للبيت (عشان يقعد جمب امه )ومستعجل قوى بسلامته (اللوجو متحرك )


هل فكرت فى اغلاق المدونة ؟ والسبب ؟


حكاية انى اغلق المدونة دى ماجتش فى بالى لانى بطبعى بنشغل كتير فلو مش عايز اكتب

مش هكتب واريح دماغى وما ادخلش على اللينك بتاع المدونة بدل ما اضيع وقت وافتح

الاكونت واعمل دليت للمدونة او الاكونت كله وعلى ايه كل دا زى ما قولت اكسب وقت

وما ادخلش خالص وارتاح مالعك دا كله اعتقد الرد واضح ولا ايه ؟



ايه رد فعلك لو حد قل ادبه عليك فى التعليق ؟


والله انا قلمى سنه طويل ومفيش برايه تقدر عليه والحاجات دى انا ببصلها من ناحيتين

اولا لو الحد دا كان يستاهل انى ارد عليه ولا لا

وثانيا هل انا عندى الوقت او اسمح لنفسى حتى انى اضيع من وقتى فى انى ارد على

التفاهات او الحاجات دى ؟ بس كدة بجاوب مع نفسى على السؤالين دول وبعدها بتخذ

القرار


اسوأ مدونة ؟


والله انا مقدرش اقول ايه هى اسوأ مدونة لكن بالفعل انا عديت ومريت على مدونات بجد

مشعارف اصحابها عملوها ليه اصلا كلها او مش كلها يعنى بالظبط فيها كلام ما ينفعش

انى اسمح لامى او اختى او حد من عيلتى او اصحابى انه يقراه لانه بجد ولا يتفق مع

اخلاقنا ولا ديننا وانا بتكلم عن العرب مش الاجانب كمان وما ينفعش اقول اسم المدونات

دى عشان كمان مايبقاش بعملهم دعاية وهما ما يستاهلوش فى نوع تانى انا حابب انى

احطه فى قائمة الاسوا من بين المدونات وهو المدونات اللى بيعملها اصحابها وهما

فاكريين انهم بيبنو الهرم الرابع او بيخترعو الذرة ودول تحديدا انا عايز اقولهم فى ايه يا

بابا منك له الحياه مش كدة والحياة بيكو ومن غيركو ماشية

وانتو بلاش تغترو وتتعجبو من نفسكو قوى كدة لان معظم اللى بيقرو حاجتكو سواء شعر

او قصة او اى نوع فنى او دبى دول مش متخصصين وفى الغالب بيجاملوكو عشان

تجاملوهم انتو كمان بتعليق كويس فى مدوناتهم يا عم الامور اللى بيكتب بجد او الفنان

الحقيقى ينزل ساحة القتال يعنى ينزل ويشوف الناس اتمرمطت ازاى على ارصفة

وابواب المكتبات واماكن التجمعات الادبية فى ريش وسعد الحرامى و التكعيبة وساقية عبد

المنعم الصاوى سور الازبكية والسيدة زينب اللى عايز يبقى اديب يا بابا يدخل ويعرض

شغله لو شاطر بعد فرد واحد بس من اى جماعة ادبية

زى جماهة ادم او رؤية او الفجر او غيرها كتير فى مصر تحديدا لان مصر فعلا ولادة

وابنائها بجد مبدعين ومش معنى كدة طبعا انى بقول ان المدونيين اللى بيكتبو ومش

منتميين لاى جماعات ادبيه او مابيعرضوش اعمالهم للنقاد وبيكتفو بعرضها على النت

دول مش ادباء لأ دا مش قصدى طبعا عشان فى ناس كتير انا قريت ليهم واعمالهم رائعة

جدا كمان وانا مش بنصب من نفسى حكم عليهم حاشا لله طبعا لكن انا ولله الحمد عندى

خبرة مش قليلة فى المجال الادبى والفنى عامة واقدر اميز الطيب من الخبيث من الاعمال

الادبية ودول مدونيين طموحيين وعندهم احساس عالى لكن بينقصهم الدرايه بعلم

العروض واحكام الاوزان والقواقفى ولو عرفوم وقرو كمان والله والله

والله هيبقى ليهم مستقبل ادبى مزهر بعكس اللى بيكتبو وهما فكرين انهم بيبنو الهرم زى

ما قولت وفاكرين انهم مركز الكرة الارضيه وهما ولا حاجة مجرد صفر على الشمال

مش اكتر

هيحصل ايه للايميل بتاعك بعد ما تموت ؟


انا لله وانا اليه راجعون . هيحصلو ايه هيترحم عليا يعنى ويقول ياللى كنت بتفتحنى فى

اليوم يجى خمسين مرة يا حبيبى ؟ ولا يكونش مستر ياهو والحج هوتميل والانسة جى

ميل هيبعتو برقية عزاء مشتركة للاهل والاقارب فى مصر ويصرفو تعويض كمان ؟(والله اهلى يفرحو ويقولو اخير ا جيه موتو بفايدة )

هيحصل ايه ياعم خليها على الله اذا كان صاحب الايميل هيموت الايميل مش هيموت ؟


اديت الباص وورد لحد قبل كدة ؟


والله انا مبحبش اعمل كدة لكن دا حصل مرة وانا بعدها طبعا غيرت الباص ورد تانى ودا

طبعا مش عدم ثقة فى الناس اللى خدوا منى الباص ورد لكن لانى مش بحب حد يعرف

عنى خصوصياتى او يقتحمها وانا بعتبر الايميل من الخصوصيات بتاعتى بس خلاص

السفر بالنسبالك؟

اهاااااااااااا السفر اكبر متعة واجمل حاجة فى الدنيا بس لما بغرض التغيير او الترفيه مش

حاجة تانية لانى كتير كنت بعمل سفر داخلى بين محافظات مصر المختلفة بس فى مهمات

علمية بحتة عربية تودينى للمكان وترجع بعد وقت محدد تاخدنى منه تانى وممنوع انى

اغير المكان دا طبعا وكنت بتحسر كل ما اروح اسكندرية واتحبس فى المكتبة بتاعتها ولا

فى كلية الاداب فى جامعة اسكندرية ومعرفش اخرج واتمشى فى الشارع شوية ولا حتى

اشوف البحر والكورنيش هناك لانى ببقى مقيد بجدول زمنى ماشى عليه واى خلل

يودينى ورا الشمس بس ان شاء الله لما املك الوقت الكافى والمال الكافى ايضا ان شاء الله

هبقى اعمل جولة بديلة للاماكن اللى بحب اشوفها واللى شوفتها ومعرفتش استمتع بيها

خاصة اسكندرية وجوها وارضها وبحرها وبناتها طبعا ههههههههههه

المود بتاعك ؟


انا بحب الهدوء جدا ولما اكون فى الجو الفنى مابحبش الهدوء على الاطلاق ولازم املا

اللوكيشن كله اكشنس والكواليس كلها حركات والكاميرات كلها دايرة والاضاءة متوظفة

صح بس كلها شغالة وسبوتات على كل حاجة حتى على الفراغ لانى من عشاق الفن

التجريدى وان كان العض بيقولو ان ى بعمل دا بسبب قلة الامكانيات ودا فى شىء من

الصحة لكن ليس كله بصحيح انا فى الاول كنت كدة بمعنى انى كنت بعمل عروض

تجريدية بسبب ان مفيش امكانيات مادية كتير متوفرة بعد كدة ومع دخولى عالم المسرح

التجريبى وشوفت ازاى الفرق الاوربية كمان بتعمل زيى حبيت التجريد وعشقته لدرجة

انى وانا بعمل الافلام الديجيتال بقيت اعملها فيها شىء من التجريد كمان وفى موقف

احب اذكره هنا وهو كل ما افتكره بضحك كنت لسه فى الجامعة كطالب فى الاندر

جرادويت وكنت عايز اخرج مسرحية فى مكان ما هو مكان حكومى المهم عملت

بروفات انا والفرقة اللى معايا والله وكان معايا ناس بيجو من مدينة نصر ومن اماكن بعيدة

فى مصر عشان نعمل البروفات وكانت فى مكان العرض (جمب شيراتون الجزيرة )

مش عايز احدد المكان عشان ليا فى لسه ناس مش عايز ازعلهم المهم زى ما قولت

الفرقة بتاعتى كانو بيجو من اماكن بعيدة والبنات بيجو فى تاكسيات وبيدفعو كتير طبعا

وجاتلى واحدة بتشتكى تقول انها بتدفع كتير للتاكسى ونفسها تاخد مقابل على الاقل حق

المواصلات لاننا مش هنفضل نشتغل ونصرف على شغلنا بدل ما يصرف هو علينا بعدين

الفرقة كلها قالت كدة وانا كنت استحالة ادفع من جيبى يعنى (منين يعنى انا كنت يا مولاى

كما خلقتنى انضف من الصينى بعد غسيله ) المهم فكرت كويس وقولتلهم ماشى بس نعمل

العرض الاول وربنا يسهل عملنا العرض ونجح والحمد لله ادارة المكان طلبومننا اننا نعيد

العرض كمان مرة وهنا كانت الفكرة قولتلهم انهم يشيلو تكاليف العرض لقيتهم (الادارة )

بصو لبعض وضربو اخماس فى اسداس واصل ومش اصل وكلام من دا قولت طب

نص تكاليف برضو لا حياة لمن تنادى طب ربع التكاليف ماهو اصل ومش اصل ونفس

الموال طب ربع جنيه ياعم والله راح حد من الفرقة قايل طب قولهم سبعة جنيه بس على

سبيل انى اشوف موقفهم لقيتهم فعلا مش عايزيين يدفعو ولا مليم وقال ايه الميزانية

بتاعة المكتبة لا تسمح قولت خلاص وانا كمان لن اسمح وخدنا بعض ومشينا انا والناس

بتوعى معقولة 7 جنيه يا بنى ادميين هيعملو عرض مسرحى وكمان ما يندفعوش ؟ بقينا

بجد نضحك ضحك هستيرى دا اللى بيجو من مصر الجديدة او مدينة نصر لحد مكان

العرض اللى هو مكتبة اصلا بيدفعو اكتر من عشرة جنيه مواصلات للتاكس والله كان

معايا اورجانيست كمان فاكر بيحلفلى انه كان بيدفع 20 جنيه للتاكس اللى بيجيبه رايح

وزيهم جاى وبعد فترة المهم لقيت ادارة المكتبة بتتصل ويقولولى انهم هيدفعولى خلاص

السبعة جنيه بس ليلة العرض بس (كان ممكن اعرض ويقولولى عصفورك فى العش ولا

طار) رفضت طبعا قالولى اصل فى حد مهم جاى يزور المكتبة وعايزين يتصادف وجوده

بعرضكم وحاولو يقنعونى بانى اقبل خمسة جنيه عن كل يوم بروفة وسبعه جنية عن ليلة

العرض بس طبعا قولت لاااااااااااااااااا خلاص ياحلو بانت لبتك من يوم ما دابت قشرتك

ومن ساعتها مابقتش اعمل عروض فى مكتبات تانى ولا كمخرج او حتى مؤلف


بتعمل ايه فى وقت فراغك ؟

يبدو ان سمعك تقيل هو فين دا وقت الفراغ والله والله والله نفسى احس بيه انا كل حاجة

بعملها ببقى مخططلها من مدة واى لخبطة فى الجدول بتيجى على دماغى وعلى حساب

حاجات تانية فوقت الفراف بالنسبالى يساوى صفر لانه معدوم لدرجة ان فى ناس معارف

واصحاب عندى والله بقالى كتير ما شوفتهمش وهما زعلانيين منى كتير بسبب كدة

وكتير منهم فاكرين انى سافرت لانى كتير كنت بقول هسافر لكن مسيرها تفرج ان شاء الله

والاقى وقت اعمل فيه كل الحاجات اللى بحبها واقابل فيه كل اصحابى وحبايبى


الاكلة المفضلة ؟

ولله الحمد انا مش اكول ولا بحب الاكل اصلا ومدام اكل انا باكله خلاص مش مهم بس

يكون خالى من قائمة الماكولات الممنوعة بتاعتى وهى اى اكل بينطبخ او اى اكل بيحتوى

على التوابل والتوم والبصل والسلاطات والعك دا كله مع احترامى للناس اللى بتحب الاكل

دا طبعا


الصفات اللى ورثتها من والدك ؟

الفات الوراثية المعتادة بالطبع

الصفات اللى ورثتها من والدتك ؟

بقية الصفات الوراثية الاخرى

ههههههههههههه ( انا هفقعكو عشان ماتسالوش الاسئلة دى تانى )


اكتر ست حاجات بتحبهم ؟

والله هو فى حاجات كتير بحبها مش بس 6 حاجات اسمحلى اقولهم او اقول بعضهم بس

الهدوء

الدوشة

النظام

الفوضى

المسرح

السينيما

الموسيقى

الاغانى

الشعر

الكمبيوتر بكل تخصصاته

الكتب بكل مجالاتها

السفر

التأمل

طبعا وبحب مراتى وولادى التؤام وخطيبتى (ايه عادى متجوز وخاطب الشرع محللى

اربعة )

اكتر ست حاجات بتكرههم ؟

والله انا محاولتش اعدهم بس احاول

شايف الاربع حاجات اللى كنت بحبهم فوق من شوية هما هما فى اوقات تانية بكرههم

الهدوء

الدوشة

النظام

الفوضى

الخيانة

الكدب

انكار الجميل

الظلم

الغيبة والنميمة

اليأس

الروتين والبيروقراطية

عدم الاحساس بالمسئولية

التلوث بانواعه خاصة فى المايكروباص تدخين
او اغانى هابطة
الناس اللى ماعندهمش ادب ولا حياء

الناس اللى ماعندهمش احلام يحققوها وعايشيين زى البهايم وخلاص (اسف بس

فى ناس كدة فعلا ماعندهاش ولا احلام ولا طموحات بياكلو ويشربو وينامو ويتجوزو

ويخلفو وخلاص )

لو هعد هستنى معاك لبكرة اللى بعده ياعم يالا بينا عالسؤال اللى بعده بس قبل ما انسى انا

والله ولا متجوز ولا عندى ولدين تؤام ولا خاطب عشان المصداقية بس هههههههههههه

شخصيتك نوعها ايه ؟


مع انى مش فاهم السؤال كويس بس هرد على اد ما فهمت وعسايا اجاوب كويس شخصيتى

تميل للهدوء فى كثير من الاحيان غير اجتماعى محب للعزلة والتأمل لا اعطى الامان

للناس بسرعة بسهولة اخسر صديق لاسباب ممكن تكون تافهه من وجهة نظر الاخريين

لكنها كبيرة عندى خاصة احترام المواعيد والميول الشخصية ومن الصعب جدا انى

اضيف حد الى قائمة الاصدقاء بتاعتى فعليا بس كدة

لماذا دخلت عالم التدوين ؟


والله عشان اقول واوصف حاجات انا شايفها او عشتها سواء على المستوى القومى او

الشخصى ودا معناه انى بحاول اكون مرايه للمجتمع اللى بعيش فيه لكن مش معنى كدة انى

انشر الغسيل الوسخ بتاع اهل بلدى كله واقبل كلام القريب والبعيد واللى يسوى واللى ما

يسواش وصحيح بتجينى لحظات وبخاف فعلا من النشر لبعض الحاجات اللى بتقع تحت

ايدى لكن بقول اكيد فى يوم من الايام هيجى وقت للحاجات دى وتتنشر خاصة اننا كلنا

عارفيين وشايفيين وسامعيين اللى بيحصل وان كنا كلنا عامليين مش واخدين بالنا بس

ساعات الواحد بيخرج اللى جواه فى المدونة واهو تنفيس شوية لاحسن الواحد لو سكت

على طول ممكن يطق بس برضو ارجع واقول ان مش كل حاجة تتنشر لان فى ناس من

مصلحتهم اانا كشعب نقوم على الحكومة والحكومة تقوم علينا ونفضل كارهيين بعض وهما

يتفرجو وبعدين يجو ويعملو دور المخلص ويلبدو فى البلد زى ما عملو مع بلاد تانية واعتقد

كلامى واضح ودول وامثالهم والله انا اتكعبلت فيهم بالفعل فى بداية كتاباتى فى المدونة كنت

ناشر صورة وموقف بجد تعبنى نفسيا لقيت جهة ما بتخاطبنى وعايزينى اكمل نشر

صور وموضوعات من النوع دا طبعا انا فهمت قصدهم ومن يومها ما كتبتش حاجة كدة

من اللى هما عايزيين يشوفوها لانى مؤمن لو فى مشكلى فى بلدى اهل بلدى يحلوها مع

بعض من غير مساعدة اى حد من برة شكرا مش عايزيين حد يحللنا مشاكلنا بس وعشان

كدة انا دخلت عالم التدوين عشان اقول الكلام دا بس

اجمل كلمة قيلت فى وصف مدونتك ؟


والله ما فاكر بس كتير كلام اتقال لدرجة انى مبقتش عارف فين الكلام اللى بيتقال بصدق

وفين الكلام اللى بغرض المجاملة رغم انى مابحبش حد يجاملنى ابدا

اهمية التعليق بالنسبالك ؟

جميل انى الاقى حد بيتفاعل معايا فى اللى بكتبه سواء انه يكون معايا بيتفق او يختلف لان

طبعا الخلاف فى الراى لا يفسد للود قضية لكنى اكره ان يكون حد بيكتبلى تعليق بس عشان

يجاملنى او لانى كتبتله تعليق فهو لازم يكتبلى تعليق عشان كدة انا انا بقيت فعلا افقد

الاحساس باهمية التعليق وبكتفى باحساسى فى انى اخرج اللى جوايا واقول اللى عايز اقوله

من غير ما اهتم حد قرا او علق على كلامى ولا محدش

احسن بوست كتبته؟ وضع لينك له؟

والله كل اللى بكتبه بالنسبالى الاحسن ومقدرش افضل او اميز حاجة عن حاجة لانى كاتب

حاجات شخصية وحاجات وطنية ومش عايز اقول انا هبدى حاجة على حاجة عشان ما

اكونش كداب او على الاقل عشان ما اقعش فى مرارة الاختيار لكن المدونة قدام كل الناس

اللى عاجبو حاجة يقول عليها

افضل بوست كتبته وافضل مدونة ؟

يووووووووووووه كتير جدااااااااااااااااااااااااااااااااا بس برضو افضل بوست كتبته مقدرش

اقول عليه لانى لسه مجاوب على السؤال دا اما افضل مدونة ففعلا كتير لناس كانو اجرأ

منى وقالو كل اللى جواهم بحرية تامة ومن غير خوف ورغم تهورهم واندفاعهم الا انهم

فعلا قالو الحقيقة اللى فى الغالب كانو هم ضحاياها وللاسف كتير منهم مدوناتهم اتحذفت

لكنى بحب مدونة استاذى ومعلمى الفنان خالد الصاوى ومدونة صديقى فى ايام التشرد

المسرحى الصحفى والاعلامى محمد حداد رغم اننا ماكتبناش لبعض ولا تعليق لكننا بنتابع

بعض وعلى اتصال ببعض دايما وطبعا فى مدونات تانية كتير بس مش عايز احكم

بالافضلية عشان فى ناس كتير عاملة مدونات حلوة سواء اعرفهم او معرفهمش وكل واحد

فى تخصصه يعنى مدونة الخيزرانة دى رائعة فى التصميم والجرافيك ومدونة سهر وميرام

واصحابهم فى الكتابة الشعريى جميلة ومدونة عايزة اطلق وبنوتة مصرية وعايزة اتجوز

والمجلة السيكولوجية وايام زمان كلهم رموز اجتماعية من واقع حياتنا فى بيئتنا

ما ينفعش افضل صورة فيهم على التانية لان كل صورة ليها خصائصها وكمان اياد ودعنى

اطير او لت مى فلاى مدونات فى كتابة القصة تحفة بجد ومدونة محمد غاليا وشابة مسلمة

وغيرهم مدونات دينية من الدرجة الاولى فما ينفعش افضل مدونة على مدونة الا اذا حددت

انت سؤالك وقولت افضل مدونة شعرية او افضل مدونة فى مجالات الكمبيوتر او العلوم

الاجتماعية والسايكولوجية او العلوم الدينية وهكذا يعنى ارجو ان اكون قد وفقت فى الرد

على سؤالك
الانترنت بالنسبة لك؟

شىء مقدرش استغنى عنه لانه افادنى كتير فى الدراسة والعمل ومع

الاصحاب وف عمل دعاية للحفلات اللى بتقدم اعمالى فيها سواء بشكل غنائى او مسرحى

فالانترنت بجد حاجة عظيمة او مهمة لان العظمة لله وحدة

تمرر التاج لمين؟

استاذى الفنان خالد الصاوى


صديقى الاعلامى المبدع محمد حداد

صديقتى المذيعة الرقيقة نشوى العدوى

محمد غاليا

اياد

سهر

صفاء

محاسن صابر

الخيرزانة

وكل واحد كان نفسه فى التاج ومقدرش يوصله انا بوصلهوله بايدى اتفضل يا عم

ولا تزعل بس ابقة افتكرنا بدعوة حلوة

خلاص

تم ولله الحمد خلاص وخلصت سلام